الدايرة دى طلعت موضوع كبير قوى واحنا مش حاسيين الشكل العجيب ده مهم جداً فى حياتنا ... الدايرة بتشاركنا حياتنا فى كل حاجة احنا اساسا حياتنا ما هى إلا عبارة عن دايرة كبيرة جواها دواير صغيره وكل ديره جواها دواير تانيه وإلخ إلخ ...

بوص كده حواليك شوف فى كام حاجة مدورة ... الأرض اللى احنا عايشين عليها دى كلها اساسا عبارة عن دايرة كبيرةحتى الشمس اللى منوره حياتنا مدورة ... والقمر برده مدور ....

الطفل الصغير وهو جنين بيعيش فى دائرة جوه رحم أمه 9 شهور بعد كده بيخرج لديرة الحياة .... ومن دايرة لديراة تنتهى بيه دورة الحياة ..
مسمعتش جدو الحكيم قال ايه ؟؟؟قال "يا بنى الدنيا دى مدورة يوم فوق ويوم تحت " ايوه ده غير جدو بتاع الدنيا دى زى الخيارة .. ركزوا معايا ومحدش دماغه تروح لبعييد

ده حتى يا أخى اهم الأكلات فى حياتنا مدورة ده اهم حاجة فى الأكل رغيف العيش مدور ....مسألتش نفسك فى مرة يا ترى اشمعنى رغيف العيش مدور ومش مربع مثلاً أو مثلث ...اكيد الموضوع ليه حكمة بس احنا مش عارفينها ... طبعاً انا بتكلم على العيش البلدى لحد فيكم يقولى انا باكل توست ولا حاجة ... برده قرص الطعمية ليه الطعمجى بيعمله دايرة ...

بجد الدايرة دى طلعت موال كبير قوى ... سمعت فى مرة دكتور من اللى بيجوا فى التليفزيون ... اللى هما دكاترة خريجين معهد لاسلكى المطرية ... هو فى معهد لاسلكى فى المطرية اصلاً ...

ايوه طبعاً فى معهد لا سلكى ولا أعرفه ...

المهم خلونا فى موضوعنا كنا بنقول ايه .. اه كنا بنقول عن الدكتور بتاع التليفزيون الدكتور ده قال ايه قال خير اللهم اجعله خير انهم بره اكتشفوا - وبرده مش عارف ليه دايماً الإكتشافات بتبقى بره ... عمرى ما سمعت حد بيقول اكتشفوا جوه ... جايز يكون جوه الدنيا ضلمة فمحدش عارف يكتشف حاجة ...المهم نرجع لمرجعونا الدكتور ده قال انهم اكتشفوا بره ان المريض بالإكتئاب لو قعدته فى مكان مدور جوه دايره يعنى بيستريح نفسياً وبيروح من عنده الاكتئاب وقعد قال كلام بعد كده مفهمتش منه اى حاجة ...

تفتكروا لو مكنش فيه دايرة كهربية كان بقى ايه حالنا ... اكيد كنا هندور حوالين بعض ومكناش هنعرف نعمل حاجة ... ده حتى الكمبيوتر اللى انت قاعد عليه دلوقتى ده كله عباره عن دواير الكترونية

أهلاً بيكم أهلاً بيكم ابن الدايرة بيحيكم ....

حتى فى إنتخابات مجلس الشعب والشورى والمحليات كمان برده الدايرة موجودة ...

وأوعو تنسوا معشوقة الجماهير واللى حيرت العالم كله على رأى ميمى الشربينى

"والله حيرتينا معاكى يا دائرة يا مستدية" ... كرة القدم اللى لحست دماغ الناس

ده حتى اللى اسمه ساويروس لما فكر يعمل قناة فى التليفزيون .... سماها أووووووووووووووو تى فى "مد بوزك وانت بتقولها اتعلموها بقى " ويا ترى ايه هو سر الدايرة ؟؟ ... اللى انا عرفته واللى عايز يعرفه يبعتلى فى رسالة خاصة وأنا اقوله ...

لكن اهم دايرة من الدواير دى كلها واللى بتلعب دور رئيس فى حياة كل واحد فينا واللى مينفعش نستغنى عنها من غيرها الحياة مش هيبقى ليها ريحة خالص هى الدايرة اللى كلنا بنستريح فيها وبننسى كل همومنا وبنركز تفكيرنا على حاجة واحدة وبس الدايرة دى هى دورة المياة ... "بيت الراحة"

وتدور الدائرة ... وسامحونى على التدويرة اللى انا دورتوكوا معايا فيها بس أنا اليومين دول بفكر كتييييييييييير وكنت محتاج انفس شوية ... فسسسسسسسسسس ... واشوفكم الدايرة الجاية .. قصدى الموضوع الجاى